الأول: أنت مالك يا أخي باللي بيحصل في البلد ؟!
الثاني: إزاي أنا مالي؟ ديه بلدي اللي بتولع، دول إخواتي اللي بيتقتلوا !
_ يا أخي خليك في مذاكرتك ومستقبلك!
_بتقولي خليني في مستقبلي ! بالله عليك إزاي هيبقى لي مستقبل في بلد مالهاش مستقبل! إزاي أقبل أن واحد ظالم يحكمني من جديد !
_أنت مالكش دعوة باللي بيحصل ومالكش دعوة بالسياسة.
_عايزني أبقى زي شباب جيلي اللي مش همه غير الموبايلات والنت والبنات ! عايزني أسمح لواحد فاسد يحكمني ويبوظ مستقبلي علشان مليش في السياسة! مجرد كوني ماليش في السياسة ديه لوحدها جريمة أتحاسب عليها أدام ربنا ! ديه بلدي ديه ولا بلد الجيران !
_الميدان دلوقتي الناس قاعدة بتتدبح هناك !
_الناس اللي بيتقتلوا دول دول ربنا اصطفاهم علشان يكونوا شهداء ! دول ربنا اصطفاهم علشان يبقوا جنبه، علشان يطيروا في الجنة في خواصل طيور الجنة !
ألم تسمح قوله "وليعلم الله الذين آمنوا ويتخذ منكم شهداء والله لا يحب الظالمين ( 140 )" (سورة آل عمران)، حتى بص ذكر الظالمين جنب الشهداء، شهداء ماتوا في محاربة الظلم والفساد.
_أنت إزاي تقارن بين دول وبين شهداء 73 ؟
_شهداء 73 حاربوا ضد الظلم والاحتلال الإسرائيلي، وشهداء 25 يناير حاربوا الفساد وقالوا كلمة حق أمام سلطان جائر، هؤلاء ليسوا بشهداء، بل هم أسياد الشهداء.
قال رسول الله صلى الله عليه وسلم :سيد الشهداء حمزة، ورجل قام إلى سلطان جائر فنهاه فقتله.
_خليك في حالك علشان متتأذيش !
_قال رسول الله صلى الله عليه وسلم "إذا رأيت أمتي تهاب أن تقول للظالم يا ظالم فقد تُودّع منها" !
_اللي في التحرير دول بلطجية!
_اللي في التحرير دول شباب زي الورد في أعمار الزهور، شجعان ومجاهدين في سبيل الله، ولا دليل يثبت كلامك.
_اللي في التحرير دول أقلية!
_نفترض أن دول 4% من الشعب المصري، فين ال96% التانيين من الشعب، علشان يثبتوا أنهم أغلبية !!!
_هتخربوا البلد !
_أحنا اللي هنخربها ولا الملجلس العسكري وحكومته الماريونيت اللي بقالها 10 شهور لا بتحاكم رموز فاسدة ولا عملت قانون عزل سياسي ولا رجعت الأمن للشارع ! أحنا اللي هنخربها ولا الأمن المركزي اللي ينطبق عليه القول "أسدٌ عليّ وفي الحروب نعامةٌ"
_الجيش هو الحائط الوحيد الباقي.
_المجلس العسكري لا يمثل الجيش المصري، الجيش المصري فيه من الشرفاء ما لا يُعد ولا يُحصى، وكلهم ناقمين على المجلس العسكري !
_أنت مجنون !
_قصدك عاقل !
_يا أخي طب علشان متموتش !
_إنما يموت الشجاع مرة، ويموت الجبان ألف مرة !
_____________________
21/11/2011
ليست هناك تعليقات:
إرسال تعليق